पब्लिक समाचार

६ महिना अगाडि / १५३  पटक हेरिएको

सुनसरी र धनकुटाको संगमस्थल भेडेटारबाट झन्डै १९ किलोमिटर दूरीमा साबिक राजारानी गाउँ विकास समिति रहेको छ । राजारानी गाविस वडा नम्बर ३, ६ र ८ को सिमानामा राजारानी ताल पर्छ । राजारानी पूर्वाञ्चलकै उचाइमा रहेको सबैभन्दा ठूलो ताल हो । पहिले यहाँ राजा र रानीताल थियो । अहिले भएको ताल रानीताल हो भने राजाताल खेतमा परिणत भइसकेको छ । राजाताल खेतमा परिणत भए पनि रानीताललाई नै राजारानी ताल भन्ने गरिन्छ ।

राजारानी ताल झन्डै एक किलोमिटर क्षेत्रमा फैलिएको छ । यहाँ बाह्रै महिना चिसो हुनाले गर्मी मौसममा आन्तरिक तथा बाह्य पर्यटकको भीडभाड लाग्छ । राजारानी ताल पुगेकाले डुंगामा सयर नगरे यात्रा अधुरो हुने बताइन्छ । डुंगामा ताल घुम्नुको मज्जा शब्दमा व्यक्त गर्न कठिन छ ।

तालको चारैतिर डाँडाले घेरिएको छ । तालवरिपरिका डाँडाबाट हिमाल, पहाड, तराई नियाल्दै नरमाउने को होलान् र । तालवरिपरि निर्मित चिटिक्क परेका स–साना विश्रामस्थलमा सुस्ताउँदा कम्ती आनन्द लाग्दैन । तालपरिसरमा सुरक्षा, यातायात र पानी व्यवस्था गरिएको छ । तालछेउमै शान्तिपार्क रहेको छ ।

स्थानीय आमा समूहले राजारानी ताल संरक्षण गर्दै आएका छन् । समुद्री सतहदेखि झन्डै १,६०० मिटर उचाइमा रहेको तालमा अन्य समयभन्दा शनिवार आन्तरिक तथा बाह्य पर्यटकको भीडभाड लाग्छ । पूर्वाञ्चलका अलावा भारत र भुटानबाट समेत राजारानी ताल पुग्ने गर्छन् । पछिल्लो समय वनभोजप्रेमीका लागि राजारानी रोज्जा ठाउँ बनेको छ ।

खाने बस्नेको राम्रो प्रबन्ध । होटल तथा होमस्टे सञ्चालनमा छ । स्थानीय राजारानी भिलेज रिसोर्टको मेनुमा ब्ल्याक टी २५, ब्ल्याक कफी ४५, मिल्क कफी ६० रुपैयाँ उल्लेख छ । मेनुका अनुसार, त्यति महँगो होइन ।

प्राचीनकालमा मावरक (आमा) र पावरक (बाबु) नाम गरेको पोखरी थियो । पोखरीमा खदम राजा र खदम रानी बस्थे । संवत् १८६२ मा पोखरी फुटेपछि खदम राजा र खदम रानी पाँचथरको याङ्वरक गई बस्न थालेको नेपाली विकिपिडिया डट ओरआरजीमा उल्लेख छ । पत्रकार देवेन्द्र सुर्केलीका अनुसार, लिम्बू भाषामा मावरक भनेको आमापोखरी र पावरक भनेको बाबुपोखरी हो । मावरक र पावरकलाई नै कालान्तरमा राजारानी पोखरी भन्न थालिएको हो ।

सुनसरीको धरानबाट झन्डै ३२ किलोमिटरमा रहेको राजारानी भेडेटार, डाँडाबजार हुँदै जानुपर्छ । कच्ची बाटो भएकाले भेडेटारबाट राजारानी पुग्न बसमा दुई घन्टा बढी लाग्छ ।

मंगलबार, जेठ २७, २०७७मा प्रकाशित गरिएको
प्रतिक्रिया दिनुहोस
सम्बन्धित खबरहरु
हाम्रो बारेमा

उदयपुरका जागरुक युवा पत्रकारहरुको पहलमा सञ्चालित यस पब्लिक समचार (Publicsamchar.com)ले अनलाईन प्रबिधिको माध्यमबाट ‘विश्वसंँग उदयपुरलाइ जोड्ने’ अभियान अन्तर्गत बिभिन्न समाचार, सन्तुलित विचार, अन्तरवार्ता आदी बिषयवस्तुलाई समेट्ने प्रयास गर्नेछ ।

हाम्रो टिम

पब्लिक नेटवर्क मिडिया प्रा.लि.द्वारा संचालन
कम्पनी रजिष्ट्रारको कार्यलय दर्ता न.: २३८८५७/०७७/०७८
प्रकाशक/कार्यकारी सम्पादक :मनोज श्रेष्ठ
सम्पादक :चित्र बहादुर केप्छाकी मगर
न्युज डेस्क:नारायण श्रेष्ठ /सुशिला श्रेष्ठ

सम्पर्क

१.कार्यालय :त्रियुगा नगरपालिका ११,गाईघाट
२.समाचार शाखाः ९८४२८२८०२८
३.ईमेल :[email protected]
४.ईमेल:[email protected]
५.विज्ञापन तथा सुचनाको लागि :९८०३३२२०२२