पब्लिक समाचार

३ हप्ता अगाडि / २४  पटक हेरिएको

आँखाको मूल्य
——————

प्रज्वल दीप

म घर छोडेको अन्तिम दिन,
बाको एउटा आँखाबाट तप्प खस्यो,
एक थोपा भोको निराशा !
र अर्को आँखाको परेलीमा झुन्डिइरह्यो भोलिको भातको भरोसा!

म घर छोडेको अन्तिम दिन!
आमाको एउटा आँखाबाट
खस्यो एक थोपा प्रेम !
अक्षता मुछिरहेको थालीमा !
र अर्को आँखा तेर्सियो म आएको बाटोमा ! चामल बोकेर फर्किने आशाले!

म घर छोडेको अन्तिम दिन !
दैलोमा भाउजूले
दाइ नफर्केको कुरा सम्झेर
एक थोपा दाइ खसालिन् एउटा आँखाबाट!
र अर्को आँखाको डिलमा
टिलपिल टिलपिर बनाएर अड्याइन्
मेरी श्रीमतीको सिउँदो!

म घर छोडेको अन्तिम दिन!
सानी बहिनीले खसालिन् एउटा आँखाबाट फाटेको जामा!
र अर्को आँखामा फुलाइन् तिहारका मखमली फुल!

म घर छोडेको अन्तिम दिन!
हजुरबाले एउटा आँखाबाट खसाले आफ्नो प्यारालाइसिस रोग!
र अर्को आँखामा टल्काइरहेथे ,
बज्यैको अर्बुदलाई धपाउने आशाको दीप!

म घर छोडेको अन्तिम दिन !
बज्यैको एउटा आँखामा टल्किरहेथ्यो बिदाइको बेला काँपिरहेका हातका आकृति,
र अर्को आँखाको आँसुमा देखिएथ्यो,
मैले चयनको निद्रा बोकेर ल्याउने समयमा
सधैँ सधैँका लागि आफू निदाउने त्रास !

म परिवारको त्यस्तो आँखा हुँ
जसले हेर्ने प्रतीक्षा गरिरहेछ एउटा खुसी !
यस कारण डाक्टर साब!
मेरा आँखाहरू बेचिदिनुहोस्!
जसले बचाउन सकोस् मेरो परिवारको दृष्टि !

– प्रज्वल दीप

शनिबार, आषाढ ०६, २०७७मा प्रकाशित गरिएको
प्रतिक्रिया दिनुहोस
सम्बन्धित खबरहरु
हाम्रो बारेमा

उदयपुरका जागरुक युवाहरुको पहलमा संचालनमा आएको यस पब्लिक समचार अनलाइन पत्रिकाले “विश्वसंग उदयपुरलाइ  जोड्ने” अभियान अन्तर्गत बिभिन्न समाचार , विचार , लेख , रिपोर्ट , अन्तर्वार्ता आदि बिषय साइटमा समेट्दै आएको छ ।पत्रकार र पत्रकारिताका मूल्य र मान्यतासँग बिषम परिस्थितिमा समेत सम्झौता नगरी हरेक क्षेत्रका स्वस्थ र सन्तुलित समाचार पाठकहरुका उद्धेश्य र रुचि अनुसार पस्किने हाम्रो प्रयास सदा सर्वदा रहने छ ।

सम्पर्क

१.कार्यालय : त्रियुगा नगरपालिका ११,गाईघाट
२.समाचार शाखाः ९८४२८२८०२८
३.विज्ञापन तथा सुचनाको लागि :९८०३३२२०२२
४.ईमेल :[email protected]